અમદાવાદએક કલાક પહેલા
- લિંક કૉપિ કરો
દક્ષિણ અને સૌરાષ્ટ્રમાં ભારે વરસાદ ચાલુ છે.
રાજ્યમાં ચોમાસુ ધીમી ગતિએ આગળ વધી રહ્યું છે. દક્ષિણ અને સૌરાષ્ટ્રના અનેક જિલ્લાઓમાં છેલ્લા ઘણા દિવસોથી મેઘરાજાની ધમાકેદાર બેટિંગ ચાલી રહી છે. જ્યારે મધ્ય અને ઉત્તર ગુજરાતમાં અત્યાર સુધી સામાન્ય વરસાદ પડી રહ્યો છે. હવામાન વિભાગની ચેતવણી અનુસાર, આગામી 4 દિવસ સુધી રાજ્યમાં હળવાથી ભારે વરસાદની સંભાવના છે.
રાજકોટમાં એક દિવસના વિરામ બાદ રવિવારે ફરી વરસાદે દસ્તક આપી છે.
રાજ્યભરમાં વરસાદની ચેતવણી
હવામાન વિભાગના જણાવ્યા અનુસાર દક્ષિણ ગુજરાતના ભરૂચ, સુરત, ડાંગ, નવસારી, વલસાડ, તાપી જિલ્લા અને સૌરાષ્ટ્રના જૂનાગઢ, અમરેલી, ભાવનગર, ગીર-સોમનાથ જિલ્લામાં ભારે વરસાદ પડી શકે છે. આ સાથે કેન્દ્રશાસિત પ્રદેશ દાદરા નગર હવેલી, દમણ અને દીવમાં પણ ભારે વરસાદની સંભાવના વ્યક્ત કરવામાં આવી છે. આ ઉપરાંત બનાસકાંઠા, મહેસાણા અને સાબરકાંઠા સિવાયના તમામ જિલ્લાઓમાં હળવો વરસાદ પડી શકે છે. શનિવારે ગુજરાતમાં થયેલા વરસાદની વાત કરીએ તો 11 જિલ્લાના 18 તાલુકાઓમાં વરસાદ પડ્યો હતો, જેમાં નવસારીના ખેરગામમાં સૌથી વધુ 1.41 ઈંચ વરસાદ નોંધાયો હતો.
રવિવારે પણ જાફરાબાદ તાલુકાના ગ્રામ્ય વિસ્તારમાં પવન સાથે વરસાદ પડ્યો હતો.
રાજકોટમાં ગાજવીજ સાથે વરસાદ
રાજકોટમાં એક દિવસના વિરામ બાદ રવિવારે ફરી વરસાદે દસ્તક આપી છે. શહેરના 150 ફૂટ રીંગરોડ, રામાપીર ચોકડી, શીતલ પાર્ક, માધાપર ચોકડી, નાણાવટી ચોક, મોરબી રોડ, ગ્રીનલેન્ડ ચોકડી સહિતના અનેક વિસ્તારોમાં ગાજવીજ સાથે વરસાદ થયો હતો. આ દરમિયાન શહેરના અનેક માર્ગો પર પાણી ભરાયેલા જોવા મળ્યા હતા. જણાવી દઈએ કે શનિવારે ગ્રામીણ વિસ્તારોમાં વરસાદ થયો હતો. જસદણ તાલુકાના લીલાપુર, વાવડા સહિતના ગામોમાં પણ વરસાદ પડ્યો હતો. આ વરસાદને કારણે ખેડૂતો ખેતરોમાં કામ માટે એકઠા થયા છે.
વાતાવરણમાં ઠંડક પ્રસરી જતાં લોકોને ગરમીમાંથી રાહત મળી છે.
વરસાદ બાદ લોકોને ગરમીથી રાહત મળી હતી
ભાવનગર શહેરમાં સતત બે દિવસથી વાદળછાયું વાતાવરણ છે. રવિવારે સવારથી વાદળછાયું વાતાવરણ હતું અને અચાનક વરસાદ શરૂ થયો હતો. મહુવાના મોતી જાગધર ગામે વરસાદી વાતાવરણમાં વીજળી પડતા બે લોકોના મોત થયા છે. મનરેગા રાહત માટે કામ કરતા મજૂરો પર વીજળી પડી હતી.
અમરેલીમાં સતત 11મા દિવસે વરસાદ
અમરેલી જિલ્લાના અનેક તાલુકાઓમાં છેલ્લા 11 દિવસથી મેઘરાજા મહેરબાન છે, તો રવિવારે પણ જાફરાબાદ તાલુકાના ગ્રામ્ય વિસ્તારોમાં પવન સાથે વરસાદ પડ્યો હતો. જ્યારે બીજી તરફ જિલ્લાના અનેક તાલુકાઓમાં વરસાદના અભાવે ખેડૂતો ચિંતિત છે.
,
