શેર વેચવા પર હવે જલ્દી આવશે પૈસા, જાણો SEBI ની આ નવી વ્યવસ્થાથી રોકાણકારોને શું ફાયદો થશે?
જો તમે શેર માર્કેટમાં રોકાણ કરો છો, તો એક સારા સમાચાર આવી રહ્યા છે. માર્કેટ રેગ્યુલેટર સેબી (Sebi) એ કાંઈક એવી વ્યવસ્થા કરી છે, જેમાં શેર વેચ્યાના એક દિવસ પછી જ રકમ તમારા બેંક ખાતામાં આવશે. હકીકતમાં, સેબીએ મંગળવારે જાહેર કરેલા પરિપત્રમાં શેરબજારોને વૈકલ્પિક ધોરણે T+1 સમાધાન વ્યવસ્થા અપનાવવાની મંજૂરી આપી હતી.
હાલમાં, સેબીએ વૈકલ્પિક ધોરણે આ વ્યવસ્થા લાગુ કરી છે. નવી સિસ્ટમ 1 જાન્યુઆરી, 2022 થી અમલમાં આવશે. T+1 નો અર્થ એ છે કે વાસ્તવિક ટ્રાન્ઝેક્શન થયાના એક દિવસમાં ટ્રાન્ઝેક્શન પતાવવું પડશે. હાલમાં, ભારતીય સ્ટોક એક્સચેન્જોમાં સોદા વ્યવહાર પછી બે કાર્યકારી દિવસોમાં સમાધાન થાય છે, જેને T+2 કહેવામાં આવે છે. શેર વેપારીઓ અને રોકાણકારોને T+1 સેટલમેન્ટ સિસ્ટમથી ઘણો ફાયદો થવાની અપેક્ષા છે.
શેરબજારના નિષ્ણાતોએ ગુરુવારે જણાવ્યું હતું કે, માર્કેટ રેગ્યુલેટર સેબીના વૈકલ્પિક T+1 (ડીલ અને એક દિવસ) સેટલમેન્ટ મિકેનિઝમ લાવવાનો નિર્ણય ગ્રાહકો માટે માર્જિનની જરૂરિયાત ઘટાડવામાં મદદ કરી શકે છે અને તેના કારણે ઇક્વિટી માર્કેટમાં રિટેલ રોકાણને વધારો મળશે.
માય વેલ્થ ગ્રો ડોટ કોમના સહ-સંસ્થાપક હર્ષદ ચેતનવાલાએ જણાવ્યું હતું કે, આ પગલાના ફાયદા અને ગેરફાયદા પર ટિપ્પણી કરવી ઉતાવળ હશે, કારણ કે બજારોએ કેટલાક ઓપરેશનલ મુદ્દાઓનો સામનો કરવો પડી શકે છે.
તેમણે કહ્યું કે, સમાધાન ચક્ર પુરા કરવામાં ઘણા પરિબળો અને સંસ્થાઓ સામેલ છે. તેમણે કહ્યું કે, આ કવાયત મૂલ્યાંકન કરવામાં મદદ કરશે કે T+1 અસરકારક હોઈ શકે છે કે T+2 સમાધાન ચક્ર સારું છે.
શેરખાન, બીએનપી પરિબાસના સીઇઓ જયદીપ અરોરાએ જણાવ્યું કે, નવો T+1 સેટલમેન્ટ નિયમ નિયમનકાર તરફથી એક સારું પગલું છે, કારણ કે તેનાથી ગ્રાહકો માટે માર્જિનની જરૂરિયાત ઘટાડવામાં મદદ મળશે અને ઇક્વિટી માર્કેટમાં છૂટક રોકાણ વધશે.
લર્ન એ ડોટ કોમના સ્થાપક અને સીઈઓ પ્રતીક સિંહે જણાવ્યું કે, T+1 શેરબજારમાં ભાગ લેનારા તમામ લોકો માટે આવકાર્ય પગલું છે. તેમણે કહ્યું કે, સ્ટોક એક્સચેન્જો પાસે આ વ્યવસ્થાને પસંદ કરવાનો વિકલ્પ છે, પરંતુ પ્રશ્ન એ છે કે જો એક બજાર T+1 પસંદ કરે અને બીજું ન કરે તો તેનાથી મૂંઝવણની સ્થિતિ ઉભી થઈ શકે છે.
આ માહિતી જાગરન અને અન્ય નેશનલ ન્યુઝ એજન્સીઓના ન્યુઝ આર્ટિકલ માંથી સંપાદન કરી લીધેલ છે.
